A Obra

Sinopse

Como serían os tres porquiños e o lobo feroz hoxe en día? Onde poderían atopar un lugar seguro e limpo, lonxe das grandes fábricas, no que poder construír as súas casiñas? Que ritmos musicais empregarían para se presentar?

A resposta a todos estes interrogantes, coma todo, está nos libros, e tamén na moderna historia que vai construíndo un explorador afeccionado aos contos que percorre o bosque na procura dos seus personaxes favoritos. Adiviñades cales son?

 

 

A nosa proposta

Nesta iniciativa intentamos modernizar a fábula orixinal para adaptala aos tempos que corren, transmitindo aos máis pequenos os valores de respecto e protección da natureza, a solidariedade ou o esforzo, entre outros.

A técnica dramática empregada para a obra é a dos corpóreos, personaxes a tamaño real que recrean á perfección a imaxe humanizada dos tres porquiños e mailo lobo feroz. Ademais, para facilitar a interacción coa rapazada, o condutor da obra será un explorador moi afeccionado aos contos, que irá desgranando os misterios desta nova historia do século XXI.

A banda sonora orixinal, composta por cinco pezas musicais, servirá para facer partícipes os cativos/as das coreografías que se van sumando ao fío argumental da obra, ao mesmo tempo que valerán como ferramenta para que aprendan ou reforcen os números, as cores, as prendas de roupa e os animais, entre outros coñecementos marcados no currículo escolar.

Durante os 50 minutos de duración da obra, o público poderá cantar e bailar mentres vai coñecendo os misterios dunha obra clásica que segue vixente malia o paso dos anos.

 

 

Musical

As cinco composicións musicais, con letras e refráns pensados especialmente para os nenos e nenas son:

 

Oink! Oink! Oink!

É a carta de presentación de Os tres porquiños, onde cada un deles dará a coñecer a súa personalidade a través do rock.

 

Coidado co lobo!

O temible lobo feroz baixa das montañas para relatar, a ritmo de soul, as súas andanzas.

 

A muiñeira dos animais

Que mellor maneira de aprender os nomes dos animais da granxa que a través do ritmo máis tradicional de Galicia? Dende cando un elefante é un animal doméstico?

 

Aprendede esta canción 

E con ela, as cores e as pezas de roupa coas que visten os tres porquiños.

 

Contamos ata dez

Un porquiño, dous, tres… e a partir de aí, os protagonistas contarán (e cantarán) a cantidade de cousas que hai enriba do escenario.

 

 

Información de interese

Público familiar con cativos/as a partir de 2 anos.

Duración: 50 minutos máis fotos cos protagonistas ao remate da función.

Idioma: Galego.